அண்ணாமலை பல்கலையில் 80 சிறப்பு அதிகாரிகள் அதிரடி இடமாற்றம்

சிதம்பரம்: சிதம்பரம் அண்ணாமலை பல்கலைக்கழக தொலை தூரக்கல்வி இயக்ககத்தில் பணியாற்றும் சிறப்பு அதிகாரிகள் மற்றும் தொடர்பு அதிகாரிகள் 80 பேர் அதிரடியாக இடமாற்றம் செய்யப்பட்டு உள்ளனர். சிதம்பரம் அண்ணாமலை பல்கலைக்கழக நிர்வாகத்தை தமிழக அரசு பொறுப்பேற்றதில் இருந்து அதிரடியாக பல்வேறு மாற்றங்கள் செய்யப்பட்டு வருகிறது. பல்கலைக்கழகத்தில் பணியாற்றி வந்த பல்வேறு புல முதல்வர்கள் மற்றும் துறை தலைவர்கள் மாற்றப்பட்டு, பணிமூப்பு அடிப்படையில் புதிய புல முதல்வர்கள், துறை தலைவர்கள் நியமிக்கப்பட்டு உள்ளனர். அண்ணாமலை பல்கலைக்கழக தொலை தூரக்கல்வி இயக்ககத்துக்கு 100க்கும் மேற்பட்ட படிப்பு மையங்கள், தகவல் மையங்கள் உள்ளன. இந்த படிப்பு மையங்கள் மற்றும் தகவல் மையங்களில் பணியாற்றி வரும் சிறப்பு அதிகாரிகள் மற்றும் தொடர்பு அதிகாரிகள் சுமார் 80 பேர் அதிரடியாக பல்வேறு மாவட்டங்களுக்கு இடமாற்றம் செய்யப்பட்டு உள்ளதாக தகவல் வெளியாகி உள்ளது. இந்த படிப்பு மையங்களுக்கு மாணவர்கள் அனுமதி சேர்க்கை வரையறையை எட்டாத சிறப்பு அதிகாரிகள் மற்றும் தொடர்பு அதிகாரிகள் இடமாற்றம் செய்யப்பட்டு உள்ளதாக பல்கலைக்கழக வட்டார தகவல்கள் தெரிவிக்கின்றன.