கிரிகெட்:மேற்கிந்திய தீவுகளுக்கு எதிரான தொடரை வென்றது இந்தியா

கான்பூர்:  மேற்கிந்தியத் தீவுகள் அணிக்கு எதிரான ஒரு நாள் தொடரைக் கைபற்றியது இந்தியா.ஷிகார் தவாணின் அதிரடி சதத்தின் துணையுடன்,3-வது மற்றும் கடைசி ஒருநாள் போட்டியில் இந்தியா 5 விக்கெட்டுகள் வித்தியாசத்தில் வெற்றி பெற்றது.

இதன் மூலம் மொத்தம் 3 போட்டிகள் கொண்ட இந்தத் தொடரை, இந்தியா 2-1 என்ற கணக்கில் கைப்பற்றியது.

கான்பூரில் நடந்து முடிந்த இப்போட்டியில், 264 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணி 46.1 ஓவர்களில் 5 விக்கெட் இழப்புக்கு 266 ரன்கள் எடுத்து வெற்றி பெற்றது.

துவக்க ஆட்டக்காரர் ரோஹிஷ் சர்மா 4 ரன்களில் ஆட்டமிழக்க, மற்றொரு தொடக்க ஆட்டக்காரரான ஷிகார் தவாண் அதிரடி ஆட்டத்தை வெளிப்படுத்தினார். அவர் 95 பந்துகளில் 119 ரன்கள் குவித்தார்.

கோலி 19 ரன்களில் ஆட்டமிழக்க, தவாணுடன் சிறப்பாக விளையாடிய யுவராஜ் சிங் 55 ரன்கள் சேர்த்தார். பின்னர், களமிறங்கிய சுரேஷ் ரெய்னா நிதானமாக பேட் செய்து 34 ரன்கள் எடுத்தார்.

கேப்டன் தோனி ஆட்டமிழக்காமல் 23 ரன்களையும், ரவீந்திர ஜடேஜா ஆட்டமிழக்காமல் 2 ரன்களையும் எடுத்தனர்.

மேற்கிந்திய தீவுகள் தரப்பில் ராம்பால், பிராவோ ஆகியோர் தலா 2 விக்கெட்டுகளையும், நரேன் ஒரு விக்கெட்டையும் கைப்பற்றினர்.

முன்னதாக, இந்தப் போட்டியில் டாஸ் வென்ற இந்திய அணி, மேற்கிந்திய தீவுகளை முதலில் பேட் செய்ய அழைத்தது.

அந்த அணியின் துவக்க ஆட்டக்காரர் சார்லஸ் 11 ரன்களில் ஆட்டமிழக்க, மற்றொரு துவக்க ஆட்டக்காரரான பவலும், சாமுவேல்ஸும் அணிக்கு நல்ல அடித்தளத்தை ஏற்படுத்தினர்.

பவல் 70 ரன்களையும், சாமுவேல்ஸ் 71 ரன்களையும் சேர்த்து, அணியின் ரன் எண்ணிக்கையை வெகுவாக கூட்டினர்.

அவர்களைத் தொடர்ந்து டெரன் பிராவோ நிதானமான ஆட்டத்தைக் கடைபிடித்தார். அவர் கடைசி வரை ஆட்டமிழக்காமல் 51 ரன்கள் சேர்த்தார். அவருக்கு பக்கபலமாக இருந்த சமியும் ஆட்டமிழக்காமல் 37 ரன்கள் எடுத்தார்.

சைமன்ஸ் 13 ரன்களிலும், துவைன் பிராவோ 4 ரன்களிலும் ஆட்டமிழந்தனர்.

இறுதியில், மேற்கிந்திய தீவுகள் தனது இன்னிங்ஸ்சில், 50 ஓவர்களில் 5 விக்கெட் இழப்புக்கு 263 ரன்கள் சேர்த்தது.

இந்திய தரப்பில் அஸ்வின் 2 விக்கெட்டுகளையும், புவனேஸ்வர் குமார், சமி மற்றும் ஜடேஜா ஆகியோர் தலா ஒரு விக்கெட்டையும் வீழ்த்தினர்.

மூன்று போட்டிகள் கொண்ட இந்த ஒருநாள் தொடரை இந்திய அணி 2-1 என்ற கணக்கில் கைப்பற்றியது. டெஸ்ட் தொடரை 2-0 என்ற கணக்கில் கைப்பற்றியதும் குறிப்பிடத்தக்கது.