கடலூர்:கடலூர் மாவட்டத்தில் நேற்று வட்டார போக்குவரத்து அதிகாரி தலைமையில் நடந்த அதிரடி வாகன சோதனையில் விதிமுறைகளை மீறி வாகனங்களை ஓட்டியவர்களிடம் இருந்து அபராதம், வரி விதிப்பு மூலம் ரூ.87 ஆயிரம் வசூல் செய்யப்பட்டது.கடலூர் மாவட்டத்தில் போக்குவரத்து விதிமுறைகளை மீறி வாகனங்கள் இயக்கப்பட்டு வருவதாக கடலூர் வட்டார போக்குவரத்து அதிகாரி அங்கமுத்துவுக்கு அடிக்கடி தகவல் வந்தது. அதன்படி நேற்று வட்டார போக்குவரத்து அதிகாரி அங்கமுத்து மாவட்டம் முழுவதும் மோட்டார் வாகன ஆய்வாளர்களை தீவிர வாகன சோதனை நடத்த உத்தரவிட்டார்.
கடலூரில் வட்டார போக்குவரத்து அதிகாரி அங்கமுத்து தலைமையில் மோட்டார் வாகன ஆய்வாளர்கள் ஜெய்சங்கர், நல்லதம்பி, காளியப்பன் ஆகியோர் கடலூர் செம்மண்டலம் பகுதியில் தீவிர வாகன சோதனை நடத்தினர். சுமார் 4 மணி நேரம் நடந்த தீவிர வாகன சோதனையில், பள்ளிக்குழந்தைகளை அதிகமாக ஏற்றிச்சென்ற ஆட்டோ, வேன், பஸ் ஆகிய டிரைவர்களுக்கு எச்சரிக்கை விடுத்ததுடன், அவர்களுக்கு அபராதமும் விதித்தனர்.
அரசு மற்றும் தனியார் பஸ்களில் படிக்கட்டுகளில் நின்று பயணம் செய்த மாணவர்களை எச்சரிக்கை செய்து, உள்ளே அனுப்பியதுடன், சம்பந்தப்பட்ட பஸ் டிரைவர்களுக்கு அபராதமும் விதித்தனர். மேலும் அதிக சத்தம் எழுப்பக்கூடிய காற்று ஒலிப்பான்களையும் பறிமுதல் செய்தனர். இதேபோல் சிதம்பரம் உட்கோட்டத்துக்குட்பட்ட காட்டுமன்னார்கோவிலில் சிதம்பரம் மோட்டார் வாகன ஆய்வாளர் சத்தியகுமார், விருத்தாசலத்தில் மோட்டார் வாகன ஆய்வாளர் ஆனந்த், நெய்வேலியில் மோட்டார் வாகன ஆய்வாளர் வேலுமணி ஆகியோரும் தங்கள் பகுதிக்குட்பட்ட இடங்களில் தீவிர வாகன சோதனை நடத்தினர்.
மாவட்டம் முழுவதும் நேற்று நடந்த வாகன சோதனையில் 168 வாகனங்கள் ஆய்வு செய்யப்பட்டன. அப்போது கூடுதலாக பயணிகளை ஏற்றிச்செல்லுதல், படிக்கட்டில் பயணம் செய்தல், அதிக சத்தம் எழுப்பும் காற்று ஒலிப்பான்கள் பயன்படுத்துதல், ஓட்டுனர் உரிமம் புதுப்பிக்காமை, வெளிமாநில வாகனங்களை தமிழ்நாட்டில் இயக்கி வரி செலுத்தாமல் இருத்தல் போன்ற பல்வேறு குற்ற நடவடிக்கைகளுக்காக 28 வழக்குகள் பதிவு செய்யப்பட்டது. மேலும் அபராதம், வரி விதிப்பு மூலம் ரூ.87 ஆயிரத்து 530 வசூலிக்கப்பட்டது.
அனைவரும் போக்குவரத்து விதிமுறைகளை பின்பற்றி வாகனங்களை இயக்க வேண்டும். வெளி மாநில வாகனங்களை தமிழ்நாட்டில் இயக்கினால் அவர்கள் கண்டிப்பாக வரிக்கட்ட வேண்டும். அதிக சத்தம் எழுப்பும் காற்று ஒலிப்பானை பயன்படுத்துவதை தவிர்க்க வேண்டும். விதிமுறைகளை பின்பற்றாதவர்கள் மீது கடுமையான நடவடிக்கை எடுக்கப்படும். இந்த வாகன சோதனை தொடர்ந்து நடைபெறும் என்று வட்டார போக்குவரத்து அதிகாரி அங்கமுத்து கூறினார்.
0 கருத்துகள்:
கருத்துரையிடுக