கடலூர் முதுநகர் அருகே சங்கொலி குப்பத்தில் மாரியம்மன் கோவில் திருவிழா
நடைபெற்று வருகிறது. நேற்று மாலை தீ மிதிவிழா நடைபெற்றது. விழாவையொட்டி இரவு
பாட்டுக்கச்சேரி நடந்தது. பாட்டுக்கச்சேரியை காண சங்கொலிகுப்பம் அருகே நொச்சிக்காடு
கிராமத்தை சேர்ந்த சுமார் 20 பேர் படகில் அங்குள்ள உப்பனாற்றை கடந்து சங்கொலி
குப்பத்திற்கு வந்தனர்.
இரவு பாட்டுக்கச்சேரி முடிந்ததும் இன்று அதிகாலை 3 மணிக்கு ஊருக்கு திரும்ப
படகில் சென்று கொண்டிருந்தனர். அப்போது திடீரென ஆற்றில் படகு கவிழ்ந்தது. உடனே
படகில் வந்தவர்கள் அபய குரல் எழுப்பினார்கள். அருகில் இருந்த மீனவர்கள் மற்றும்
கிராம மக்கள் ஓடிசென்று மூழ்கியவர்களை மீட்கும் முயற்சியில் ஈடுபட்டனர்.
எனினும் படகில் வந்த சி.என்.பாளையத்தை சேர்ந்த கர்ணனின் மனைவி ராதிகா (வயது
23) நொச்சிக்காட்டை சேர்ந்த ராஜமாணிக்கத்தின் மனைவி லோகநாயகி (65) ஆகியோர் நீரில்
மூழ்கி பலியானார்கள். மேலும் நீரில் மூழ்கி தத்தளித்த ஆய்பேட்டையை சேர்ந்த கணேஷ்
(3), தினேஷ் )6), ஆதிலட்சுமி (5), திவ்யா (1), நொச்சிக்காட்டை சேர்ந்த பாரதி (17),
ஜோதி (41), ராஜவள்ளி (65), தனலட்சுமி (60), தீபா (18), தேவராஜ் (48),
கீரப்பாளையத்தை சேர்ந்த தையல்நாயகி (55), சி.என்.பாளையத்தை சேர்ந்த கர்ணன் (30)
ஆகிய 11 பேரை மீட்டு கடலூர் அரசு ஆஸ்பத்திரியில் சேர்த்தனர்.
மேலும் படகு கவிழ்ந்ததில் 7 பேர் நீரில் மூழ்கி விட்டனர். அவர்கள் கதி என்ன
ஆனார்கள் என்று தெரியவில்லை. தீயைணப்பு வீரர்கள் மற்றும் மீனவர்கள் அவர்களை தேடும்
பணியில் தொடர்ந்து ஈடுபட்டு வருகிறார்கள். சம்பவ இடத்திற்கு கடலூர் மாவட்ட போலீஸ்
சூப்பிரண்டு பகலவன் சென்று விசாரணை நடத்தி வருகிறார். இந்த சம்பவம் கடலூர்
பகுதியில் பெரும் சோகத்தை ஏற்படுத்தி உள்ளது.
0 கருத்துகள்:
கருத்துரையிடுக