நெய்வேலி பழுப்பு நிலக்கரி நிறுவனம்
(என்.எல்.சி.) தனது 56 ஆண்டுகால வரலாற்றில் அதிகபட்சமாக 2011-12-ம் நிதியாண்டில்
ரூ. 1,411.33 கோடி நிகர லாபம் ஈட்டி சாதனை படைத்துள்ளது. இது 2010-11-ம் நிதியாண்டை
விட 8.7 சதவீதம், அதாவது ரூ. 113 கோடி அதிகமாகும்.
இது குறித்து சென்னையில் என்.எல்.சி.யின் தலைவர்
மற்றும் நிர்வாக இயக்குநர் ஏ.ஆர். அன்சாரி செய்தியாளர்களிடம் திங்கள்கிழமை
கூறியது:
என்.எல்.சி. நிறுவனம் தனது 56 ஆண்டுகால
வரலாற்றில் அதிகபட்சமாக 2011-12-ம் நிதியாண்டில் ரூ. 1,411.33 கோடி நிகர லாபம்
ஈட்டி சாதனை படைத்துள்ளது. 2010-11-ம் நிதியாண்டில் ரூ. 1,298.33 கோடி நிகர லாபம்
கிடைத்தது. இந்த ஆண்டு 8.7 சதவீதம் அதிகமாக, அதாவது ரூ. 113 கோடி லாபம் ஈட்டி சாதனை
படைத்துள்ளோம். 2011-12-ம் நிதியாண்டு என்.எல்.சி. நிறுவனம் ரூ. 4,866.85 கோடிக்கு
வர்த்தகம் செய்து இந்தச் சாதனையை பதிவு செய்துள்ளது.
2011-12-ம் ஆண்டில் 1,651 லட்சம் கன மீட்டர் மேல்
மண்ணும், 2 கோடியே 45 லட்சத்து 912 டன் பழுப்பு நிலக்கரியும், 1,878 கோடி
யூனிட்டுகள் மின்சாரமும் உற்பத்தி செய்யப்பட்டுள்ளன. 1581 கோடி யூனிட் மின்சாரம்
ஏற்றுமதி செய்யப்பட்டுள்ளது. நிறுவனம் தொடங்கப்பட்ட 56 ஆண்டுகளில் இந்த அளவுக்கு
உற்பத்தி நடைபெற்றதில்லை.
நெய்வேலி இரண்டாம் அனல் மின் நிலையத்தில் மட்டும்
1,108 கோடியே 73 லட்சத்து 60 ஆயிரம் யூனிட் மின்சாரம் உற்பத்தி செய்யப்பட்டு புதிய
சாதனை படைக்கப்பட்டுள்ளது.
2011-12-ம் நிதியாண்டில் பங்கு ஈவுத் தொகையாக ஒரு
பங்குக்கு ரூ. 2.80 வீதம் ரூ. 545.97 கோடி மத்திய அரசுக்கு வழங்கப்படும். ராஜஸ்தான்
மாநிலம் பர்சிங்கரில் என்.எல்.சி அமைத்துள்ள மின் நிலையங்கள் மூலம் 27 லட்சத்து 40
ஆயிரம் யூனிட் (2,740 மெகாவாட்) மின்சாரம் உற்பத்தி செய்யப்பட்டுள்ளது என்றார்
ஏ.ஆர். அன்சாரி.
பேட்டியின்போது, என்.எல்.சி. நிர்வாகக் குழு
இயக்குநர்கள் ஆர். கந்தசாமி, பி. சுரேந்தர் மோகன், ஜே. மகிழ்செல்வன், சரத்குமார்
ஆச்சாரியா, ராகேஷ் குமார் ஆகியோர் உடனிருந்தனர்.
0 கருத்துகள்:
கருத்துரையிடுக