மீன்பிடி தடைக்காலம் நேற்றுடன் முடிவடைந்ததைத் தொடர்ந்து கடலூர் மாவட்டத்தில்
மீனவர்கள் மகிழ்ச்சியுடன் மீன்பிடிக்க கடலுக்கு சென்றனர்.கடல் மீன்வளத்தை பாதுகாக்கும் பொருட்டு மீன் இனப்பெருக்க காலமான ஏப்ரல் 15ம் தேதி முதல் மே 29ம் தேதி வரை 45 நாட்கள் ஆழ் கடலில் மீன் பிடிக்க தமிழக அரசு தடை விதித்துள்ளது.
மீன் பிடி தடைக்காலத்தில் கடற்பரப்பில் 15 நாட்டிக்கல் மைல் வரை மட்டுமே சென்று மீன் பிடிக்க முடியும்.
கடலூர் மாவட்டத்தில் நல்லவாடு முதல் தாண்டவராயன் சோழகன் பேட்டை வரை 45 மீனவ கிராமங்களில் 25 ஆயிரத்திற்கும் மேற்பட்ட மீனவர்கள் மீன்பிடித் தொழில் செய்து வருகின்றனர்.
மாவட்டத்தில் 742 விசைப்படகுகள், 1600 பைபர் படகுகள் மற்றும் கட்டு மரங்கள் உள்ளன. இவற்றில் மீனவர்கள் கடலுக்கு சென்று மீன்பிடித்து வருவது வழக்கம்.
தடைக் காலங்களில் பைபர் படகுகள், கட்டுமரங்களில் சென்று மட்டுமே மீனவர்கள் மீன் பிடித்தனர்.
இதனால் விசைப்படகுகள் அனைத்தும் கரையில் நிறுத்தப்பட்டு, படகுகள் மற்றும் வலைகளை பழுது பார்க்கும் பணியில் மீனவர்கள் ஈடுபட்டிருந்தனர்.
இந்நிலையில், மீன்பிடித் தடைக்காலம் நேற்றுடன்(29ம் தேதி) முடிந்ததால் மீனவர்கள் தங்கள் விசைப்படகுகளில் மீன்களை பதப்படுத்தி கரைக்கு கொண்டு வர ஐஸ் கட்டிகள் இருப்பு வைத்தனர். நேற்று மாலை முதலே மீனவர்கள் மீன் பிடிக்க கடலுக்குள் மகிழ்ச்சியுடன் புறப்பட்டு சென்றனர்.
பரங்கிப்பேட்டை முடசல் ஓடை, சூரியாநகர், கூழையார், முழுக்குத்துறை, எம்.ஜி.ஆர் திட்டு, கிள்ளை, சின்னவாய்க்கால், பில்லுமேடு, பட்டரையடி மற்றும் டி.எஸ்.பேட்டை சுற்றுப் பகுதியில் உள்ள மீனவர்கள் நேற்று காலை 10 மணிக்கு அஷ்டமிக்கு பின் கடலில் மீன் பிடிக்க சென்றனர். மீனவ பெண்கள் உறவினர்களை அனுப்பி வைத்தனர்.
கடலூர், பரங்கிப்பேட்டை துறைமுகங்களில் அதிகளவில் மீன்கள் பிடிக்கப்பட்டு விற்பனை செய்யப்படுகின்றன. இங்கிருந்து உயர் வகை இறால், கணவாய், கடல்நத்தை, நண்டுகள், வஞ்சிரா உள்ளிட்ட மீன்கள் தைவான், சிங்கப்பூர், மலேசியா, ஐரோப்பா மற்றும் அரபு நாடுகளுக்கு ஏற்றுமதி செய்யப்படுகின்றன. அதை போல் மத்தி, ரத்தசுறா உள்ளிட்ட மீன் வகைகள் கேரளா கர்நாடக மாநிலங்களுக்கு விற்பனைக்கு அனுப்பப்பட்டு வருகின்றன.
மீன்கள் விற்பனை மற்றும் ஏற்றுமதிக்கு 30 கம்பெனிகள் உள்ளன. ஆண்டொன்றுக்கு கடலூர் மாவட்டத்தில் ரூ 300 கோடி அளவிற்கு மீன் வணிகம் நடைபெறுகிறது. அன்னிய செலவாணியை ஈட்டித் தருவதில் கடலூர் பரங்கிப்பேட்டை மீனவர்கள் முக்கிய பங்காற்றி வருகின்றனர். மீன்களின் இனப்பெருக்க காலத்தில் அவற்றை பாதுகாக்க ஆண்டு தோறும் ஏப்ரல் 15 முதல் மே 29ம் தேதி நள்ளிரவு வரை 45 நாட்கள் கடலில் மீன் பிடிக்க தடை விதிக்கப்பட்டது.
கடலூர் மாவட்டத்தில் மீன்பிடி தடைகாலத்திற்கு மீனவர்கள் முழு ஒத்துழைப்பு அளித்தார்கள். பழுதடைந்த படகுகளையும் வலைகளையும் சீரமைத்தனர். வீடுகளை புதுப்பித்தனர்.
இதுகுறித்து தமிழ்நாடு மீனவர் பேரவை மாவட்ட தலைவர் சுப்புராயன் கூறுகையில், மீன் பிடி தடைகாலத்தில் அரசு அறிவித்திருந்த ரூ.2 ஆயிரம் உதவித்தொகை கடலூர் மாவட்டத்தில் இது வரை யாருக்கும் வழங்கப்படவில்லை. அதனை உடனே வழங்க வேண்டும்.
அதை போல் மீன் பிடிக்க முடியாத காலங்களில் அரசு அறிவித்த ரு 4 ஆயிரம் உதவித்தொகை கடலூர் மாவட்டத்தில் 60 சதவீதம் மட்டும் தான் வழங்கப்பட்டுள்ளது. மீதமுள்ள 40 சதவீதம் மீனவர்களுக்கும் விரைவில் வழங்க வேண்டும்.
கடலூர் துறைமுகம் ரூ 10 கோடி மதிப்பீட்டில் சீரமைக்கப்படும் என அரசு அறிவித்தது. ஆனால் அதற்கான பணிகள் எதுவும் தொடங்கப்படவில்லை.
அரசின் அறிவிப்பை மழை காலம் தொடங்குவதற்கு முன்னதாக செயல்படுத்த வேண்டும்
0 கருத்துகள்:
கருத்துரையிடுக