ரூ1 கோடி செலவழித்தும் பயனில்லை நெல்லிக்குப்பம் பேருந்து நிலையத்தை மீண்டும் செயல்படுத்த ஆலோசனை

 ஒரு கோடி ரூபாய் செலவிட்டும் பயனின்றி உள்ள நெல்லிக்குப்பம் பேருந்து நிலையத்தை மீண்டும் செயல்படுத்துவதற்காக வட்டார போக்குவரத்து அலுவலர் நேற்று ஆய்வு செய்து அதிகாரிகளுடன் ஆலோசனை மேற்கொண்டார்.
நெல்லிக்குப்பம் நகராட்சி சார்பில் கடந்த மூன்று ஆண்டுகளுக்கு முன்பு ஒரு கோடி ரூபாய் மதிப்பீட்டில் புதிய பேருந்து நிலையம் கட்டப்பட்டது. இந்த பேருந்து நிலையத்தில் பத்து கடைகள், ஒட்டல் வசதி, கழிப்பிட வசதிகள் அமைக்கப்பட்டுள்ளது. ஆனால் இந்த பேருந்து நிலையம் சிறப்பாக செயல்பட மாவட்ட ஆட்சியர்கள் பல முறை முயற்சி மேற்கொண்டும் பயனில்லை. பேருந்து நிலையம் பொது மக்களுக்கு பயன்படாமல் கிடப்பில் போடப்பட்டுள்ளது. அரசு பணம் பாழாய் போகும் நிலை உருவாகியுள்ளது.
இதையறிந்த நகராட்சி ஆணையர் சுரேந்திரஷா, மாவட்ட ஆட்சியர், அரசு போக்குவரத்து கழகம், வட்டார போக்குவரத்து அலுவலகம் உள்ளிட்ட அரசு அதிகாரிகளுக்கு நெல்லிக்குப்பம் பேருந்து நிலையம் மீண்டும் செயல்பட நடவடிக்கை எடுக்க வேண்டும் என கோரிக்கை மனு கொடுத்துள்ளார்.
அதன் பேரில் வட்டார போக்குவரத்து அலுவலர் ஜெய்சங்கர் பேருந்து நிலையத்தை நேற்று பார்வையிட்டு நெல்லிக்குப்பம் வழியாக கடலூர் பண்ருட்டி சாலையில் செல்லும் அரசு மற்றும் தனியார் பேருந்துகளை பேருந்து நிலையத்துக்குள் சென்று பயணிகளை இறக்கி, ஏற்றி செல்ல வேண்டும் என உத்தரவிட்டார். பின்னர் பேருந்து நிலையத்தின் இருபுறங்களில் உள்ள மின் கம்பங்கள், கட்டிடங்களை அகற்றினால் பேருந்துகள் சிரமமின்றி உள்ளே சென்று வர முடியும் என கூறினார்.
ஆய்வின் போது அரசு போக்குவரத்து கிளை மேலாளர் கணபதி, தாசில்தார் பத்மாவதி, நகர்மன்ற தலைவர் சுதாகர், ஆணையர் சுரேந்திரஷா, வட்டார போக்குவரத்து ஆய்வாளர் சரவணன் மற்றும் அதிகாரிகள் உடனிருந்தனர். பின்னர் நகராட்சி அலுவலகத்தில் பேருந்து நிலையம் செயல்படுவது குறித்து பல துறை அதிகாரிகளுக்கான சிறப்பு கூட்டம் நடந்தது.
இது ஒரு கோடி ரூபாய் செலவில் கட்டப்பட்ட பேருந்து நிலையம் அரசு அதிகாரிகளின் அலட்சிய போக்கால் தான் பாழாய் போனது. பல முறை அதிகாரிகள் திடீரென வந்து பஸ்சை உள்ளே வரவைத்து போட்டோவுக்கு போஸ் கொடுத்து விட்டு செல்வது வழக்கம். அதே போல் தான் இப்போதும் வந்து கடமைக்கு பார்வையிட்டு செல்கின்றனர்.
மக்களின் வரிப்பணமான அரசு பணம் பாழாகாமல் பாதுகாக்க வேண்டும் என்ற உண்மை உணர்வுகள் அதிகாரிகளுக்கு இருந்தால் உடனடியாக பேருந்து நிலையம் செயல்பட நடவடிக்கை எடுப்பார்கள் என பொது மக்கள் கூறுகின்றனர்.