இத்தாலி நிலநடுக்கத்துக்கு 16 பேர் பலியாகி உள்ளனர். 8 ஆயிரம் பேர் வீடுகளை இழந்து தவித்து வருகின்றனர். இத்தாலியின் பார்மா நகர் அருகே நேற்று சக்தி வாய்ந்த நிலநடுக்கம் ஏற்பட்டது. ரிக்டர் அளவில் 5.8 புள்ளிகளாக பதிவான இந்த நிலநடுக்கத்தால் வடக்கு பகுதி முழுவதும் உணரப்பட்டது. கேவஸ்ஸோ, மிரான்டோலா உள்ளிட்ட நகரங்களில் வீடுகள், கட்டிடங்கள் இடிந்து விழுந்தன. மக்கள் அலறியடித்து ஓடி வெட்டவெளிகளில் தஞ்சமடைந்தனர். போக்குவரத்து கடுமையாக பாதிக்கப்பட்டது. கட்டிட இடிபாடுகளில் சிக்கி 15 பேர் பலியானார்கள். நேற்றிரவு மேலும் ஒருவர் சடலம் மீட்கப்பட்டது. இதைத் தொடர்ந்து பலி எண்ணிக்கை 16 ஆகியுள்ளது. மேலும் பலர் சிக்கி இருப்பதால் பலி எண்ணிக்கை உயரலாம் என அஞ்சப்படுகிறது.
மீட்பு பணிகள் முழு வீச்சில் நடந்து வருகிறது. கேவஸ்ஸோ நகரில் 12 மணி நேரமாக கட்டிட இடிபாடுகளில் சிக்கி இருந்த ஒரு பெண் உயிருடன் மீட்கப்பட்டார். நிலநடுக்கத்தில் காயமடைந்த 350 பேருக்கு மருத்துவமனைகளில் சிகிச்சை அளிக்கப்பட்டு வருகிறது. 8000 பேர் வீடுகளை இழந்துள்ளதாக இத்தாலி அரசு தெரிவித்துள்ளது. அவர்கள் தற்காலிக முகாம்களில் தங்க வைக்கப்பட்டுள்ளனர். நிலநடுக்கத்தில் பலியானவர்களுக்கு பிரதமர் மரியோ மோன்டி இரங்கல் தெரிவித்துள்ளார். இத்தாலியில் கடந்த 10 நாட்களுக்கு முன்பு, 6 ரிக்டர் அளவில் ஏற்பட்ட நிலநடுக்கத்தில் 8 பேர் பலியானார்கள். 5 ஆயிரம் பேர் வீடுகளை இழந்தனர். கடந்த 2009ம் ஆண்டு ஏற்பட்ட நிலநடுக்கத்தில் 300 பேர் இறந்தனர் என்பது குறிப்பிடத்தக்கது.
0 கருத்துகள்:
கருத்துரையிடுக